GENERALE. Oh! sí ch'a l'è malavi!... sicur.... nouj' autri i na sentiou nen d' couste, a vintün an chité 'l servissi!... Salvo che malavi o strouppià.... Già am disia Quint, so courounnel quand a l'era ant Piemount Real, ch'a l'avia vœuja d' fé nen.
      CONTESSA. Però, da lò ch'am diou, i so cambrada, ai vouliou ben. Sturdí coum' na sioula, loulí sí, i joeu sempre sentilou dí. Ma na! un boun fioulas.
      GENERALE. Sempre ai arest.
      CAPITANO. General, s'am përmett.... l'è vera, a l'era souens ai arest, ma nen për motiv d' servissi. Già ch' la seira, finí so servissi, loulí.... j'era gnun boun a tnilou. Magara a caval sensa sela.... Hop!... un temp d' galop.... loulí a Turin; j'lou sœu ch'i j'erou noui d' guarnison, e i fasiou 'l bastren tuta la neuit.
      MARCHESA. Bravou, bele cose!....
      CAPITANO. Cous' vœulla, magna, militar.... Souma pa d' seminarista! Vers la matin peui un autr temp d' galop, e a quatr'oure an piassa d'Arme a la Veneria a fé 'l detai.
      GENERALE. Tutt loulí l'è bel e boun, me car Marches, ma cavai e omini, la nœuit l'è faita për durmí.... i souma pa d' ratevouloire, e a butesse s' le singie, lour e i cavai, i sœu nen vaire coum'un peussa dí pœui d'esse d' boun ufissiai. E pœui dop chità Piemount Real, a pasa antle Guardie provinsial, e andasia për Turin coun coul capel bianc e la crouata a l'enfant: già sempre an cativa coumpagnia, an mes ai pitour, ai cantant, e un dí j'erlou pa tacaje ch'a vouliou canté n'opera al teatro Paisana?... Revel l'a mandalou ciamé, e a t'a datie un tousun!... Na, na.... (scuote la testa in segno che il cavalier Massimo poco gli va).
      CAPITANO. Oh! për lo, a l'a fane d' bele. Un dí a l'a traversà a sdos, al galop la spasgiada d' la Veneria.... vestí da angel.