» - el fa mostra de vess on gatt. El le lassa indormentà ben ben e pœu a poch a poch l'è reussì a tiraghela giò. E pœu via l'è andàa con la soa coverta. El mago, la mattinna, el cerca la coverta e la trœuva no, el la trœuva in nissun sit. Cerca e cerca, no gh'è vers de trovalla in nissun sit: - «Ah, quel balòss de quel Tredesìn, ch'el m'ha fàa quella di trè170. S'el me po reussì a vegnì in man.... domà, che poda reussì a aveghel in di man, mi già el mazzi, perchè el me n'ha faa tropp.» - Lu, el Tredesìn, el va del Re. El Re, el ghe dis: - «Bravo, ma te see propi bravo, te ghe see reussì. Adess te do ona gran somma, che pœu ti te staree ben. Adess te devet famen on'altra: allora te set on sciòr171. T'hê de famen on'altra, e allore te deventet on scior. Te devet fà in manera, de consegnamm a mi el mago.» - «Com'hoo mai de fà? Ch'el mago adess, s'el me ciappa, el me mazza! Basta, faroo de tutt, per fagh anca questa.» - El pensa, el se vestiss172 tutt divers de quell del sò sòlit173, el mett ona barba finta e pœu el va là. El ghe dis a soa mièe - «Voj!174 gh'è minga in cà el voster marì?» - «Si, ch'el gh'è; adess vòo a ciamall subet.» - E el Tredesìn, el ghe dis: - «Mi sont vegnùu chì de lu, perchè gh'hoo bisogn on piasè175. L'ha de savé, che mi hoo mazzàa vun, che ghe disen el Tredesìn, e hoo de fagh la cassa e gh'hòo minga de ass176 de faghela. Sont vegnùu de lu a vedè, s'el vœur mingà damm di ass.» - El mago, el dis: - «Bravo, t'hè fàa ben de mazzall: te doo subet i ass. Ven chì, ven chì! Te juttaròo177 anca mi a falla, la cassa, per mett denter quel birbòn. Va là!...» - El ghe da di ass; e lu, el s'è miss adree, el Tredesìn, a fà la cassa.