Fili, nobis non existit incognitum, quod nonnulli ex progenitoribus supradictis probatae rectitudinis intendentes mentibus erectis ad Dominum; circa praefatam ecclesiam, ejusque pastores, qui fuerunt pro tempore, laudibilis devotionis et obedientiae titulis claruerunt; sed et ipsa velut mater benevola et sincera, et in gratiarum exhibitione munifica, favoribus illos constituit eximiis, amplis praevenit honoribus, et gloriosis impendiis extitit prosecuta, cum circa devotionis, et reverentiae filios suae irriguum influat largitatis. Cum itaque patris more benevoli de filiorum statu sollicite cogitantes, tuam, et fratrum tuorum salutem, honorem, et commodum cupiamus ac propterea te ac ipsos curiosis et sollicitis studiis revocare procuremus ab invio, per quod tu et ipsi periculose nimis inceditis, ut ad salubrem rectamque semitam libentissime reducamus, nobilitatem tuam hortamur attentius, tibique paternis affectibus suademus, quatenus sedula meditatione discutiens, quod durum est contra stimulum calcitrare, quodque pugnare non est facile contra Deum: considerans etiam, et prudenter attendens brevem stultitiam minoris esse dispendii, quam diffusam: quodque romana ecclesia mater et magistra fidelius, cujus supra fidei firmam petram summus ille pontifex verum constituit fundamentum, quanto amplius duriusque impetitur, tanto fortius invalescit, caelesti munimine stabilita, devotus et deferens redire non differas ad ipsius ecclesiae prompte semper ad veniam beneplacita et mandata, fratres tuos ad id vigilantibus studiis inducendo: nam tu et ipsi eam vobis invenietis procul dubio favorabilem et benignam.