'Na vota vosi jiri p'un misi a caccia luntanu. Si purtò la sò Sirvitù, e accuminciò li so' camini. Unni si va a 'rriduci? nna dda campagna unni cc'era la pupa. Comu vitti sta pupa: — «Haju fattu la mè caccia! turnamu!» Si pigghia sta pupa e si la metti avanti cavallu. «È bedda sta pupa! — dicia strata strata — cunsiddirati la patruna!» e caminava dicennu: «È bedda sta pupa! cunsiddirati la patruna!» Junci a palazzu, e chi fa? va nna la sò cammara; cci fa fari un 'ngastu 'nta lu muru, 'na vitrina, e si metti a talialla vintiquattr'uri lu jornu389, dicennu sempri: «È bedda la pupa! cunsiddirati la patruna!»
      Jamu ca stu picciottu 'un vosi vìdiri cchiù a nuddu, e si pigghiau di tanta malancunia ca sò patri appi a chiamari Giunta di medici. Vennu li medici, l'osservanu: — «Maistà, nuàtri 'un nni sapemu nenti di sta malatia; viditi chi havi cu ssa pupa.» Lu Re java nni lu figghiu; lu figghiu jisava l'occhi nni la pupa: — «Ih! È bedda la pupa! cunsiddirati la patruna!» Vinevanu li medici, e comu vinevanu si nni javanu. Stu picciottu390' assittatu a taliari e a diri sempri: — «Ih! È bedda la pupa! cunsiddirati la patruna!» E sempri si sucava, e suspirava. Lu Re quannu si vitti persu, tuccò campana di Cunsigghiu. — «Viditi mè figghiu com'è ridduttu! Iddu 'un havi frevi, iddu 'un havi botta 'n testa, ma iddu mi stà squagghiannu, e la mè Riami si l'havi a guariri àutru!... Datimi cunsigghiu!391» — «Maistà, vi cunfunnìstivu? 'Un cc'è sta picciotta ch'ha fattu truvari a la figghia di lu Re di Spagna, e ha gualutu392 a 'n'àutra Rigginedda?