» — Vedi questo stesso nelle Tredici piacevolissime notti di M. G. Francesco Straparola ecc. (In Venetia, MDCXIII), notte IX, fav. 2.
      VIII.
     
      La panza chi parra.
      Signuri, si cunta ca cc'era un Re e 'na Riggina; stu Re e sta Riggina avianu un figghiu unicu. Arrivannu a l'età di dicidott'anni, lu patri lu vulia maritari, ma lu figghiu cci dicia: — «Maistà, è troppu prestu.» Lu patri sempri truzzava543, e lu figghiu cci dicia sempri: — «Maistà, è troppu prestu.» 'Na jurnata lu figghiu pi livàrisi sta siccatura cci dici: «Ora tannu544 io mi maritu, quannu trovu 'na donna ca cci parra la panza.»
      Lu Re tocca campana di Cunsigghiu: eccu tutti li Cunsigghieri. — «Signuri mei, chi cunsigghiu mi dati? Io haju stu figghiu, e dici ca tannu si marita quannu trova 'na donna ca cci parra la panza. Io la mè Riami 'un la vogghiu fari gòdiri a nuddu545.»
      Si susi un vecchiu saviu, e dici: — «Maistà, pi mè sintimentu, pigghiàti dudici Granni di Curti, cu dudici pitturi, e li mannati a firriari546 tuttu l'universu munnu: cu' va a lu Purtugallu, cu' a lu Brasili, cu' nna la Spagna, cu' 'n Francia: cu' trova la donna chi cci parra la panza, cci fannu lu ritrattu e lu portanu a Vui; si a vostru figghiu cci piaci, e va beni, si nun cci piaci 'un si nni parra cchiù.»
      Cumannu di Re: dudici Granni di Curti partinu cu' pi ccà, cu' pi ddà, ognunu un pitturi. Unu di chisti, comu dicissimu lu Principi di Butera547, si pigghia un pitturi bonu, e cu lu sò sirvituri si metti a caminari. Camina camina, si nni veni un'acqua 'mpituusa; la negghia ca 'un cci fa vìdiri nenti, e si 'mmoscanu 'nta un voscu.