Pagina (257/500)

   

pagina


Pagina_Precedente  Pagina_Successiva  Indice  Copertina 

      Succedi ca scinni la Rigginedda, e cci veni facci frunti stu muzzu di stadda. Idda taliò a iddu, iddu taliò a idda: si taliàru tutti dui. Dici la Rigginedda a lu cucchieri maggiuri: — «Monsù758, cu' è chistu?» — «'Ccillenza, cci arrispunni lu cucchieri, è un poviru viddanu ca mi lu pigghiai pi muzzu.» — «Mai, ca chistu, pirsuna bona havi a essiri» (dici la Rigginedda). — Veni ccà: (cci dici a lu muzzu), tu dunni si'?» — «Di sti paisi» (comu dicissimu di Capaci759). — «Comu ti chiami?» — «Franciscu» (ca iddu s'avia canciatu lu nnomu).» — «E tò patri chi fa?» — «Mulinaru.» — «E comu lu lassasti?» — «'Ccillenza, mi vulía vastuniari, e io mi nni fujvi.» A la Rigginedda stu discursu 'un cci parsi tantu sinceru.
      'Na jurnata lu chiama e cci dici: — «Franciscu, io ti vogghiu fari livari di la stadda, e acchianari susu. Ti piaci?» — «A mia! (cci arrispunni Mandruni) comu voli.» La Rigginedda parra a sò patri; lu Re cci dici: — «Fa chiddu chi vòi»; e la Rigginedda fici fari a Mandruni unu di la cucina. La Rigginedda avia li fitti di Giulia760, e spissu spissu scinnia 'nta la cucina e cci facia a Mandruni: — «Franciscu, comu ti chiami?» — «Ma nun lu sapi! Franciscu.» — «Ma no cuntamilla bona, cà tu nun ti chiami Franciscu, e nun fai lu mulinaru.» — «Ma si cci dicu ca sugnu mulinaru.»
      Truzza ora, truzza poi,761 Mandruni cci cuntau di la prima all'urtima parola; ca iddu si chiamava Mandruni, era figghiu di lu Re di Sicilia, e si nn'avia jutu ammucciuni di sò patri e di sò matri, pirchì 'na vecchia cci avia jittatu la gastìma ca 'un si putissi maritari s' 'un truvava a una chi si chiamava Mandruna.


Pagina_Precedente  Pagina_Successiva  Indice  Copertina 

   

Fiabe novelle e racconti popolari siciliani
Volume Primo
di Giuseppe Pitrè
pagine 500

   





Rigginedda Rigginedda Rigginedda Capaci Rigginedda Mandruni Rigginedda Rigginedda Mandruni Rigginedda Giulia Mandruni Franciscu Mandruni Mandruni Sicilia Mandruna