Pagina (25/388)

   

pagina


Pagina_Precedente  Pagina_Successiva  Indice  Copertina 

      » — «Spugghiàtivi.» — «Chi ura è?» — «Ura chi mè papà vinía di lu tiatru.» — «Tu si' mè mugghieri.» — «Tu si' mè maritu» e finiu(110). Lu 'nnumani la picciotta era bedda cuntenti. Lu jornu lu Riuzzu accumparia sirpenti, la notti un beddu giuvini e si gudía l'amuri.
      Passannu 'na pocu di misi la Riggina matri un si putía pirsuadiri ca la Rigginedda stava accussì cuntenti cu lu sirpenti; si sfirniciava pinsannu a sta cosa: ma, 'un cci nni dicía nenti.
      'Na jurnata la Rigginedda cci addumanna pi grazia a sò maritu di farisi vìdiri ammenu pri na 'vota omu. Iddu cci l'accurdau e cci dissi: — «Dumani affaccia di lu finistruni: tu vidi passari un Cavaleri chi ti saluta cu lu cappeddu: chistu è tò maritu; ma sta' attenta a fatti toi, ca si tu pìpiti, lu maritu cci l'appizzi; e tannu mi pôi truvari, quannu mi cerchi 'ntra fàvuli e cunti(111).»
      Lu 'nnumani comu fineru di manciari lu sirpenti spiríu. La Rigginedda affaccia a lu finistruni: la Riggina cu idda. Passa un cavalirottu, si leva lu cappeddu e saluta. Idda lu saluta e cci ridi. La Riggina si squadiàu(112), l'afferra pi li capiddi e la tira dintra: « — Ah! traditura, accussì tratti a mè figghiu pirchì è sirpenti?» La povira nora comu si vidi fari sta parti, si scorda ca lu maritu l'avía appricittatu(113), e cci dici: — «Maistà, chiddu chi vi pari unu stràniu, chistu è vostru figghiu, ca è 'nfatatu, e lu tennu li fati 'n putiri: la notti è omu, e lu jornu è sirpenti.»
      La notti lu sirpenti 'un s'arricugghíu!... s'arrigurdau idda di la parola di lu maritu, e si metti a chianciri a chiantu ruttu.


Pagina_Precedente  Pagina_Successiva  Indice  Copertina 

   

Fiabe novelle e racconti popolari siciliani
Volume Secondo
di Giuseppe Pitrè
pagine 388

   





Riuzzu Riggina Rigginedda Rigginedda Cavaleri Rigginedda Riggina Riggina