Lu tempu java passannu; e stu Bracceri niscía pazzu pinsannu ca avia a jiri a la morti. 'Na siritina era capaci ca si dava l'arma a capputteddu(402): lu cappeddu 'mmanu, li capiddi all'aria: — «E com'hê fari! E com'hê fari!» Lu vidi 'na vecchia: — «Signuri Cavaleri, mi fa la caritati, ca sugnu morta di la fami!» — «Vattinni, vecchia di lu diavulu!» — «Pi caritati, ca io l'ajutu.» — «E chi m'ha' a ajutari!» — «Sissignura: vassía mi dici chi havi, e io l'ajutu.» Chiddu 'na cosa ca 'nsiríu; dici: — «E chi vôi?» — «Nenti: Voscenza(403) si cunfida cu mia, e videmu si io l'ajutu.» Lu Bracceri si pirsuasi e cci cuntau lu tuttu. — «Uh! e Voscenza pi chissu è cunfusu? Lassassi fari a mia, e lu signali l'havi 'nta la sacchetta(404).» — «Senti, si tu mi fai chista, io ti fazzu un gran cumprimentu.»
      Ora chi successi la notti? un'acqua a sdilluviari. La vecchia darreri lu purtuni:— ba-ba-ba!(405) trimannu di lu friddu; e chiancía ca facía sfardari lu cori(406). E 'nta mentri, lampi, trona, saitti, ca facìanu scantari. Comu la signura, ch'era la soru di Don Giuseppi, senti stu rancùru(407) e stu lamentu: — «Mischina! dici; facìtila tràsiri, e chiujìti lu purtuni arreri». Grapèru lu purtuni e la vecchia s'assittau dintra lu purtuni. Comu trasíu: — «Baba-ba-ba! pi caritati, ca staju murennu di friddu!(408)» La 'ntisi la signura: — «Mischina! facìtila acchianari: basta chi nun fa accussì.» La signura, ch'avia lu bon cori, la fici manciari, e la vecchia fincennu sempri ca trimava di lu friddu.