Li latri turnaru beddi ricchi a li so' paisi e nun ficiru cchiù li latri.
      Iddi ristaru cuntenti e filiciE nâtri ristammu cu l'amici.
      Cianciana(444).
     
      VARIANTI E RISCONTRI
     
      Il principio è simile alla VIII.
      Tutto il resto è suppergiù la Storia di S. Ginueffa, di cui vedi la nov. X e i suoi riscontri.
      LXXVIII.
     
      Lu Zu Viritati.
      'Na vota si cunta e s'arriccunta ca cc'era un Re. Stu Re 'nta li soi lochi avía 'na pocu di bistiami; ma avia affizioni a un vitidduzzu(445), ch'era beddu, ma beddu di 'un si putiri diri, e lu Re l'amava tantu ca lu chiamava Corna d'oru. Stu vitidduzzu lu Re l'avia affidatu a un omu ch'avia tantu 'n creditu, ca pi suprannomu cci avia misu Zu Viritati. E veru Zu Viritati era, pirchì lu Re nun cci avia pututu mai truvari 'nta la sò vucca 'na minzogna. Lu Re vulia spissu a lu Zu Viritati a Palazzu, e pigghiava cuntu di lu sò vitidduzzu, chi cci avia raccumannatu vita pi vita.
      'Na vota lu Re si truvau cu li so' Ministri, e 'nta lu menzu di la cummirsazioni, lu Re accuminzau a parrari di st'omu, chi s'avirria fattu livari la testa p' 'un diri 'na farfantaria. Li Ministri, chi sapianu lu fattu di Corna di oru, dui di chiddi si vutàru, e dissiru: — «O Maistà, chi diciti! 'Un dici farfantaríi lu vostru omu? Scummittemu, ch' 'un scappa tempu chi chissu chi chiamati Zu Viritati v'havi a vèniri a 'mpapucchiari(446) 'na minzogna.» — «Putiti scummettiri, arrispusi lu Re, quantu vuliti, ca minzogni chistu nu nni dici nè ora, nè mai.» E misiru un feu l'unu di scummissa. — Li dui Ministri chi ficiru?