Cunsiddirati la cuntintizza di sta matri. Cci iju cu Cavaleri e Dami di Curti. Comu vidi a sò figghia, si cci accìccia a lu coddu e nun la lassa cchiui. Poi vìnniru li figghi, e cunsiddirati puru la sò cuntintizza; e ficiru 'na gran festa pi tuttu lu Regnu, e arristaru filici e cuntenti.
      Palermo(561).
     
      VARIANTI E RISCONTRI
     
      La suoru sfurtunata.
     
      'Na vota c'eranu tri suoru. Una si chiamava Rosa, n'àutra Cuncetta, e n'àutra Peppa. Sti suoru nun si putìanu vìdiri, e ogni mumientu si sciarriavanu. A chidda chi iddi 'un putianu vidiri, ca era Peppa, la notti mentri chi idda durmia, ci iju la mali Sorti e la chiamau: — «Peppa, Peppa!» e poi si nni iju a lu liettu di la suoru cchiù granni e ci mittia un cutieddu sutta lu chiumazzu. Rosa lu 'nnumani comu iju pi livari lu liettu vitti lu cutieddu e dissi: — «Cu' fu chi mi misi lu cutieddu a lu capizzu? Chissa nun potti essiri menu di Peppa, pirchì nui sempri cu idda ni sciarriamu.» Allura iju pi Peppa cu un vastuni, e ci iju a dari vastunati. Lu 'nnumani di notti la mala Sorti la iju a chiamari arrieri: — «Peppa, Peppa!» e allura pigghiau un cutìcchiu(562), e lu iju a misi sutta lu chiumazzu di Cuncetta. Lu 'nnumani Cuncetta livau lu liettu e truvau lu cutìcchiu. Spijau; e comu vitti ca nuddu ni sapía nenti, si misi a dari vastunati a Peppa.
      La notti appressu la Sorti la chiamau arrieri, e ci iju a mettiri un paru di fuòrfici sutta lu sò stissu capizzu. A lu 'nnumani Peppa livau lu liettu e vitti lu paru di fuòrfici. Spijau a li so' suoru, e si 'ntinnía liggitimari pi li notti passati: — «Cu' fu ora, ci dissi, ca misi li fuòrfici sutta lu mè stissu capizzu?