Pagina (322/388)

   

pagina


Pagina_Precedente  Pagina_Successiva  Indice  Copertina 

      Doppu chi si nni iju iddu, la Riggina la chiamau, e 'ncuminciaru a cùsiri; 'ntra 'na vutata d'occhi di la Riggina idda si misi 'na cammisedda 'n pettu: trasíu lu figghiu e cci dissi a sò Mamà la Riggina: — «Mamà, a cui teni ccà? a ssa latra? chissa è capaci di arrubbàricci tutti cosi!» e chi fa? cci ancugna, cci 'nfila la manu 'n pettu e cci pigghiau la cammisedda. Cunsidirati chi sorti di murtifcazioni chi appi la sfurtunata! e ddocu iddu cci fici 'na letta seria; la Riggina cci dissi rimpruvirànnulu: — «Basta, chisti sunnu cunti di fimmini, e a tia nun t'apparteni»; di poi cunfurtau ad idda chi chiancía a chiantu ruttu: doppu chi passau tuttu cci dissi la Riggina chi lu 'nnumani l'aspittava arrè, — «chi avemu a 'nfilari 'na pocu di perni.» La sira comu s'arricugghíu iddu, 'n chiancennu la picciotta cci cuntau tuttu; iddu cci dissi chi chissu Re era avaru, e chi nun si nn'avía a 'ncaricari di soccu cci dicía iddu: — «Chiuttostu, dici, ha' a circari di pigghiariccinni quarchi filu di perni, e ti l'ammucci 'n sacchetta.» E accussì fici. Lu 'nnumani la Riggina la chiamau, 'ncuminciaru a 'nfilari perni, la Riggina iju pi muddari un mumentu(768), idda si 'nfila 'n sacchetta un filu di perni! Tantu assai nun avía passatu chi avía vinutu la Riggina, chi trasíu lu Re; comu la vitti, cci dissi a sò Mamà: — «A ssa latra cci duna 'n putiri li perni? vidi quantu cci nn'ha pigghiatu!» Senza tanti cirimonnii cci 'nfila la manu 'n sacchetta, e cci pigghia lu filu di perni. Nun vi pozzu diri nè cuntari chiddu chi fici lu Re, e quantu cci nni dissi; tantu chi a idda cci avía pigghiatu un sintòmu; e basta: la Riggina cci fici ciarari una carraffina(769), cci detti tantìcchia d'acqua; comu vosi Diu, rivinni.


Pagina_Precedente  Pagina_Successiva  Indice  Copertina 

   

Fiabe novelle e racconti popolari siciliani
Volume Secondo
di Giuseppe Pitrè
pagine 388

   





Riggina Riggina Mamà Riggina Riggina Riggina Riggina Riggina Riggina Mamà Riggina Diu