(1255) Pour ce que le chevalier sçait que mes amis s’en est allez, il est ore venuz en cest chastel;(1256) et dist que il aura de moi sa voulenté, vueille ou ne vueille.(1257) - Je cuidoie [336] certainement que elle me deist verité de quanque(1258) elle me disoit; et elle me mentoit du tout. Et je li respondi: Damoisele, dites que vous voulez que je fache du chevalier, et je suis appareilliez de faire. Commandés, et je le ferai: bien le sachiez.(1259) - En nom Dieu, fait la damoiselle, je vueil que vous me vengiez de la honte que il me pourchace.(1260) - Damoiselle, dis je, voulez vous que je l’occie? - Oÿl, dist elle: je vueil que vous le metez a mort. - Certes, dis je, voulentiers. Quant voulez vous que je viengne a chief de cestui fait? - Je le vous dirai bien, dist elle. Or vous souffrez encore ung pou, tant que je voie que il en soit lieu et temps.(1261) Celui soir meismes, bien a tart, vint a moi la damoiselle, la ou je estoie en prison,(1262) et me dist: Sire chevalier, doi je bien estre dolente et couroucie. Le chevalier dont je vous tins hui parlement, si est repost hui dedens ma chambre, ne sai a quelle heure. Orendroit, quant il vist que mes damoiselles s’estoient parties de moi et alees en leur chambres, adonc se monstra il a moi, et me dist que il estoit mestier que il feist de moi sa voulenté. Et qu’en diroie je? Il a fait si fol hardement, que il s’est couchiez dedens mon lit touz nuz, et pour moi ne s’en veult remuer.(1263) Quant je entendi ceste nouvelle, dis je: De si fol chevalier comme est cestui, n’oï je parler onques maiz.