Et quant je voi que il de ceste folie ne se veult chastoier(1264) pour vostre amonnestement(1265), je l’en ferai repentir orendroit, se vous voulez. - En nom Dieu, dist la damoisele, se vous a mort ne le metez, donc ne m’est il pas avis que vous amez tant vostre compaignon comme vous en faites semblant.(1266) - Damoisele, dis je adonc, or ouvrez l’uis de ceste prison ou je sui, et me donnez une espee: et puis me menez, se il vous plaist, a vostre lit, ou le chevalier est couchiez, si comme vous dites. Et se je adonc ne vous venge, ne me tenez pour chevalier.»
      [337] «Après ce que je oi dite ceste parole a la damoiselle, elle n’i fist autre demourance; ains defferme l’uis de la prison tout maintenant, ou je avoie ja demouré grant temps, et puis m’aporte une espee. Et quant je fui yssus de la prison, elle me mist l’espee entre mes mains, et puis me dist: Venez après moi. Et je li diz: Allez seürement, damoiselle, que se je ne fais vostre voulenté de ceste chose, ne me tenez pour homme. Quant nous fusmes tant allez de chambre en chambre, que nous fusmes venus a la maistre chambre(1267) de leenz, ou la damoiselle gesoit acoustumeement, et mon compains autressi, a celui point droitemente dormoit mon compaignon en son lit. Et celle vouloit que je l’occeisse, pour ce que je li avoie dit, que je ne m’accorderoie a sa voulenté faire, tant comme il vesquist(1268). Je cuidoie bien que la damoiselle ne beast(1269) a si grant malice, comme estoit celle. Me mis je en la chambre erraument(1270), l’espee en la main toute nue, car pour ce que je avoie promis a la damoiselle d’occire le chevalier dont elle m’avoit tant parlé, li vouloie je tenir sa promesse.