Que vous dirois je? Puis qu’elle fut menee en my le palais, le roy luy dist en soubzriant: Damoiselle, or estes vous delivre de tous les chevaliers du monde. Je vous donne congié d’aler vous ent au chevalier de cest palais que vous plus amés, pour quoy il s’i vueille accorder. - Sire, fait elle, de cestuy don vous mercy je moult; et je le feray tout maintenant. - Et lors se tourna vers moy, et me dist devant tous: Dans chevaliers, se Dieux me gart, sachés que d’icy en avant ne vueil je plus avoir vostre compaignie. Je la reffuse en toutes manieres. Je ne vous vueil plus; querez une autre qui vous vueille; car de tant comme j’ay demouré o vous(1651), me tiens je a moult deshonnoree. Je m’en vois(1652) a celuy que je plus ayme de vous. - Lors s’en ala au mauvais chevalier, qui tant estoit lais, vil et hideux en toutes guises, si comme je vous ay compté. Et quant elle fut a luy venue, si dist: Or sachés bien, sire chevaliers, que en cest palais n’a orendroit nul chevalier que je tant aime comme je fais vous. - Quant le roy de Norhombellande vit que la damoiselle avoit fait si merveilleux change, si se commensa a seigner de la merveille qu’il en eüt; et aussi faisoient tuit li autre chevalier de leans. Et les dames et les damoiselles distrent que onques en leur vivant damoiselle n’avoit fait si mauvais change comme cil changes avoit esté. Et de la grant vergoingne que je en eü, me partis je toutmaintenant de leans, si courroussé, que je ne prins congié ne au roy ne a autre; et m’en partis a tel eür(1653), que oncques plus ne vy la damoiselle, ne parler n’en oÿ a homme qui la congneüst.