El dito proveditor, presenti tutti, usò molto bone parole offerendo l'armata a la obedientia sua, secondo che la Signoria nostra li havia comandato. La majestà sua ringratiò, et rispose dicendo, aspectar quelli effecti che la sua magnificentia offeriva, ne li quali havea speranza, secondo soleno esser le altre dimostration di la illustrissima Signoria, a la quale gran obligatione si trova havere, et così exortava et pregava quanto più presto potesse, dovesse etc., come haveriano insieme a ragionare. Poi la majestà sua pigliò per mano el dito proveditor, e intrò in un'altra camera dove stetero insieme bon pezo. Si laudò di sua majestà in publico poi el proveditor, et fo recompagnato da li do dicti signori fino a le galie. [92] El re ritornerà domatina in campo. El signor Virginio si dice esser a Campobasso. Di qua molti si dole di la dimora dil signor marchexe, pregando si accelerasse dicti pressidii, et di questo il magnifico don Scipio Figliomarino me parloe.
     
     
      Sumario di lettera di 21 ditto.
     
      El re cavalchò questa matina a Poggioreale, et si dovea poner in camino per tornar in campo; ma andorono poi di compagnia el legato et le reine tutte do a trovar sua majestà. Non partendo questa sera, se ne andarà domatina. Assai si mormora dil tardar dil marchexe, perché la dimora è pericolosa, perché li nimici pretendeno quella doana. El re studia non possino passar. El signor don Cesare et el signor Prospero con bona gente stano atenti a Nocera. El campo dil re è con gente assai. Li stratioti fano il dovere, e quel proveditore è in gran reputatione apresso la majestà dil re, e tutti si dice, el re di Franza che conduceva tanto exercito e artigliarie se ne vene presto, et il marchexe tarda assai.