[1496 04 30]A dì 30 april, nel consejo di pregadi, fo gran disputatione, et steteno fin hore una e meza di note per risponder a Milano in la materia sopra scripta, che dimandava ajuto di 400 homeni d'arme et 100 milia ducati imprestedo da la Signoria, come fo divulgato, per ajutarsi contra francesi che minazava vegnerli adosso, et il suo orator era in questa terra, tramava di riconzar la liga et maxime con li potentati de Italia. Or fo risposto a Milano in forma che restoe contento, et poi fece scriver per l'ambasador nostro Marco Dandolo apresso di lui existente, che ringratiava la Signoria, ma che 'l non bisognava altro aiuto, perché avea aviso francesi non esser per venir questo anno di qua da' monti, etc.
     
     
     
      Nuove dil mexe di mazo 1496.
     
      [1496 05 02]A dì 2 ditto, la vezilia di la Croxe intrò in porto le do galie erano state al viazo di Barbaria, capitano Jacomo Capello, assà carge di mercadantie. Naroe la cossa di la ysola di Zerbi, et come il re di Spagna non la volleva.
     
      Item, come a Tunis prese la nave di quel corsaro bischaino chiamato Nicolò Bonfio, el qual di le sue man scampoe et fo questo avosto passado.
     
      Item, come havia conduto in Cicilia, levato a Valenza, el conte de Gulisano, et do mia sora porto preseno le ditte galie uno pesse molto grande et inusitato a veder, et molti lo andono a veder sul campo di Sancto Anzolo, poi, puzando, fo butato a l'aqua.
     
      In questo zorno vene lettere di Brandizo dil proveditor de 20 april. Narava haver habuto tuta la congnatione, et volleva altri fanti per custodir la terra, et che in la rocha havia messo 60 fanti, et nel castello dil porto 40 fanti con Francesco Contarini suo nepote vice castelan, fino venisse Zacaria Loredan electo per pregadi, el qual non si havia expedito ancora.