Item, come esso proveditor, con il resto di le galie, si dovea levar dil porto per l'aere cativo di Napoli, et andar in porto a Procida, mia .... lontano.
     
     
      Copia di una lettera mandata a Napoli al proveditor di l'armada,
      per do soracomiti, scrita a dì 30 april in Castelona.
     
      Magnifice tanquam pater honorande. Mercore a mezo zorno, che fo a dì 26, zonzessemo de qui. El zorno seguente, da matina, andassemo a trovar el signor capitano Rechexens, e da parte de vostra magnificentia fessemo le debite recomandatione et oferte, el qual feze el simile verso noi in nome de vostra magnificentia. Dal qual volessemo saper et intender quello sua signoria havea da novo. Rispose che in la terra non era più che homeni 500, tra li quali molti erano amalati, e disea la terra era molto streta da fame. E molto sua signoria desiderava la venuta dil signor principe insieme con vostra magnificentia, non dubitando che, zonti qui, vostra magnificentia subito haverase la terra, dove che, si cussì fosse, saria molto a proposito de la majestà dil signor re e de quelli de li quali desiderano andar a repatriar. Ma molto mi dubito, come per haver visto, sì per haver auto piena informazion, che avanti tal impresa habbi suo effecto, sarà non pocho ma asai da far, eo maxime che, el zorno de missier San Marco, usitino fuora 300 francesi e corseno per in fino al borgo di Castelona et prese homeni 4, dove che, questo intravenuto, fo fato comandamento, mercore venendo zuoba ad hore 4 di note, che noi se dovessemo levar e andar a sorzer per mezo Castelona, dicendo haver auto per spia che la note doveano ussir fuora e venir a meter a sacho el borgo de esso Castelon, dove andassemo e nula ussite.