Pur il forzo judichava non veria di qua da' monti, né etiam il voler de' venitiani era che 'l vegnisse in Italia non se intendendo altra movesta de' francesi, acciò che barbari più non la depredasse, et etiam per servar soa cesarea majestà ad altri bisogni. Ma il ducha de Milano volea el venisse.
      A dì 19 ditto, vene lettere di Corfù da Marchiò Trivixan capitano zeneral nostro da mar de 28 zugno, per le qual se intese il suo viazo, zoè che a dì 16 zugno, a hore 4 di note, si partì da Zara, e a dì 17 a hore 22 sorse a Sibenico, e a dì 19 hore 7 partì da Sibinico e sorse a Trau a dì 20 a hore 24, et a dì 22 hore 14 sorse a Spalato; partì a meza [240] note, et a dì 23 sorse a Liesna. A dì 25 partì per Curzola, sorse mia 6 lontan di Curzola a Sabionzeli, e fo la vezilia di San Zuane Batista, dove fu fato gran feste con trombe, 30 ferali impiadi atorno il fanò, bombarde, rachete, etc. justa il consueto, in honor dil sancto. Et a dì 24 hore 14, sorse uno mio lontan da Ragusi, et li vene contra tre ambasadori, et li presentò. A dì 25 sorse poi a Casopo, et Hironimo Contarini proveditor di l'armada, era ivi con 3 galie, li vene contra con uno bragantin. Et andato poi a Corfù a dismontar con la galia fin nel muolo, dove fo trato 147 colpi di bombarde, et recevuto honorifice da Francesco Nani baylo et capitano, messe banco per haver homeni, per menarli con sé e andar a fornir l'armada a Napoli, et che subito si partirebe per andar a Napoli, justa la sua comissione.
     
      [1496 07 21]A dì 21 ditto, nel consejo di pregadi, fu electo provedidor a Pisa, collega di Zustignan Morexini, con quel medemo salario et auctorità, Domenego Dolfin da santo Apostolo, alias stato provedador in campo a la guera di todeschi, et capitano in mar di le galie al viazo di Barbaria.