El diodar andò a Tripoli ben visto e carezado da quel Signor. In questo tempo, el signor de Alepo, per uno comandamento ebe el castellan dil soldam, fo preso dal populo e messo in castello, dove l'è, come per letere ozi ricevute di 13 si ha. Quella terra era stà in gran remor, e nostri merchatanti stà serati in caxa.
     
      A dì 13, si have letere dil Cajaro de sier Almorò Cabriel, come Campsom Campsomì si avia fato soldam con el favor di tutti i corness (sic), e ajuto de i 4 armiragii primi de lì, tra li altri Campsom El Fi, Campsom Siemi, Zuam Belat; etiam di 24 machademi di li primi, e durò soldam zorni 3. Dapoi, i zelibi s'aveano sublevato, e combatevano el castello par cazar el ditto Campsom e mantenir el soldam. [290] Poi, per lettere in mori, si ha Campsom cazato dil castelo è reduto in campo di là dil Nilo, e avea tolto tuti li cavali de li zelibi, i qual erano serati in casa et mantenia il soldam. E Campsom era stà ferito da un vereton, chi dice da uno schopeto, in la galta; chi dice è morto; chi è vivo.
     
      E seguito il garbujo, il soldam spazò uno caschì con 1300 schiavi, el qual dovesse trovar questo diodar e condurlo al Chajaro, dove che, essendo zonto el ditto caschì a Gazera, e inteso la nova per el diodar che era in Tripoli, si à levato con quel Signor e il sig. di Gazera, e fin hora à in compagnia cavalli 2000, tra li altri 500 schiavi dil signor di Aleppo fuzidi a lui, e molti altri schiavi di condition, i qual era con Batal. El qual diodar, a dì 19 di questo, pasò da Baruto.