Ne ha fato gran danno questa nave Contarina, perché l'è stà comprà oglii assai per nostri venitiani vien a comprar i nostri oglii in casa nostra. Non hè meglio venderli, cha meter la roba e le persone a pericolo? deché me par habino bona opinion, possando far i fatti soi a caza soa, non andar per mar. Io ho voluto scriver queste poche parole, acciò sappi el tutto. Poiché non habiamo possuto cargar ne la Barbaria, Dio non ha voluto che del tuto se habiamo partiti disconsolati de la Barbaria, unde, in viso andagando a l'isola de Zerbi, a dì 5 de avosto discoverzissemo una nave la qual era in terra e nui andavemo al nostro camin perché non pensavemo de corsari, benché hebi incalzo io quando andai a Mazachares per levar i corali da 4 barze e 2 fuste, e credi, che Dio me ajuta, se non havesse habuto bona galia, altri che Dio non me scapolava che non fosse prexo, peroché me deno l'incalzo da Cavo Zibele fino dentro de la Golleta de Tunis. Gli haveno pacientia. Dio me ajutò e basta. Saria longo narar el tutto. Or noi non pensavemo che ai Zerb
      i fosse corsari. Judicavimo fosse zerte nave de formenti mandati per el viceré de Sicilia, perché quel locho, parte se tien per mori, parte se tien per il re di Spagna, et lì se atrovava uno legato del re de la Castiglia; siché noi judicavimo che quella nave che vedevemo sorta fosse de quelle de formenti. Or vedemo che la nave se lieva fazendo gran forzo de velle, in modo che se chaza a fuzer. Noi che vedessemo questo, li andassemo drieto, et io, che ho meglior galia de le altre, li montai a vento, in modo li tulsi la via del mar.