Questo non li parse di andar, et per le gran pene non potendo refudar, si volse al dito consejo excusar, et lui medemo parloe. Tamen non fu aceptata la sua scusa. Et fo a dì 2 novembrio pur un altro consejo. Fo aceptata, et electo in loco suo, come dirò di soto.
     
      In questo zorno, atento che el capitano zeneral da mar nostro stava con l'armada a Napoli con pocha reputation di la Signoria, et con desasio del viver, et senza profitto alcuno ivi stava con 12 galie, fu preso che 'l dovesse subito levarsi con tutta l'armada et che in Cicilia disarmasse le 5 galie più vechie, et poi vegnisse a Corfù, et ivi star dovesse con il resto di l'armada et con Hieronimo Contarini proveditor di l'armada ivi era con 3 galie. Ma è da saper che, seguita la morte di re Ferandino, acciò in la Puja non seguisse alcuna novità, fo fato passar el dito proveditor di Corfù in Puja, sì per conforto di le quatro terre nostri tenivano, una conquistata per bataglia et tre per danari serviti et subsidio, e questo perché don Cesaro di Aragona ivi in Puja come vice re si ritrovava. Et lì stete alcuni zorni el preffato proveditor, et poi ritornò a Corfù. Ma don Cesaro atendeva a voler recuper(18) Taranto et ivi vicino stava con zente, ma nulla fece.
     
      [1496 10 30]A dì 30 ditto, vene lettere di Zuam Mozenigo vice domino a Ferara, come, a dì 28, el zorno di San Mathio, trovandosi in strada con uno Zuam Francesco da Cesena doctor in leze et rector di scolari in quel studio, et cussì con esso vice domino scontratosi, el non voleva cieder, imo dicto retor voleva precieder el vice domino nostro, cossa contra l'honor di la Signoria.