De Yspania, de 29 octubrio fin 17 novembrio. Primo da Burgos, del zonzer ivi di Jacomo Contarini doctor tornato orator dil re di Portogallo, zonto a dì ultimo octubrio et con grandissimo honor da li regali aceptado. Li fo contra episcopi e signori assai. A dì 6 la exposition, et che quelli re haviano bon animo de proseguir contra Franza venendo in Italia, et facendo la parte sua questi de qui a tempo nuovo et per mar et per terra, e cussì per il re di Ingilterra et altri, et che de qui si dovesse far potente armata e dar da far a Franza sì per mar qual per terra, et il re Maximiano a la volta di Borgogna, e lui da due parte, videlicet li regali de Spagna, una a la volta di Fonterabia romperà a Bayona, l'altra a Perpignano. E che, havendo sentì che il lhoro capitano era a Perpignan havia fato trieva per tre mexi con monsignor di Santo Andrea, havea abuto a male, e justifichavano la causa per esser venuti francesi con impeto grandissimo et expugnato Sanses, qual habuto a patti, usono crudeltà grandissima verso quelli, occidendo grandi e pizoli, e destituendo ditto loco. Et dubitando ditto capitano don Henrico Enriches de pezo, astreto da la penuria et sterilità del loco dove se trovava e poche zente, feze ditta trieva senza saputa di ditte majestà, le qual si doleano, inferendo, se 'l roy in ditto tempo veria in Italia, non la oserveriano.
     
      Item, che quel re feva far grande aparato per proveder a ditte frontiere, e zà havia ordinà far la mostra a San Domenego in Monte, loco cussì nominato.