Et il ducha fo contento di darli la sua portione; ma non li volea dar se non fate le mostre a ditte zente.
     
      Item, el ducha havia electo orator in Ingilterra domino Hironimo de Cussano doctor, consier de justicia, di anni 37, el qual dovea andar unito con il nostro.
     
      Avisi da Zenoa, che domino Paulo e Baptistino Fregoso era per vegnir a la volta de Vintimilia con zente.
     
      Item, che 'l governador era di bon animo verso la liga contra francesi, havendo però socorso etc. et che de le discordie tra Adorni e Fieschi, era posto bon ordine di conzarle.
     
      Item, che 'l castelan di Novi havia ditto: se al ducha non li piaceva tenisse i fanti, era contento mandarli via. Conclusive, el ducha de Milano, per ditte lettere, se tenia esser ubligato a la Signoria nostra per le provisione fatte, et che, né lui, né soi heriedi mai sariano stanchi.
     
      Item, che da Verzei era lettere dil passar dil cardinal curzense de lì, el qual passò per Milan incognito vestito a la todescha.
     
      Da Zenoa, di 21, 22, dil proveditor di l'armata, come el star lì in porto con le galie non era securo, sì per el Casteleto, qual per esser quella cità cupida di novità, per le division.
     
      Da Pisa, di proveditori nostri da Cassina et Vico, [440] come i nemici atendevano a recuperar a le coline, et dubitavano non li poter resister per esser molto potenti. Zentil da Roma contestabele fu preso in San Lucha, et quel di Tarsia in Sojana. Et di la Signoria nostra era stà mandato, per lettere di cambio, ducati 15 milia per pagar stratioti, zente d'arme e fantarie, et a Zenoa fo mandà ducati 6000 per quello che potesse ocorer.