Item, esser stà trate molte artelarie verso Chienas et esser per passar da Lion in Aste alemani 600, et che 'l ditto Constantin havia dato il passo a certi alemani.
     
      Che 'l duca ringratiava la Signoria di le provision; mandava a Zenoa domino Ambrosio da Corte per ricerchar el governador si volea altro, e remeteria altri danari de lì, benché avesse ducati 20 milia in Zenoa. Et che a Milano era domino Renato Traulzi fratelo di domino Zuan Jacomo consier dil ducha, e intrava in tutti i secreti.
     
      Da Milan, di 16, do lettere. Di fanti inimici drezati verso il zenoese; dil zonzer in Brianzon Alfonso Greco con cavali 400, fanti 600 per la via di Susa; che 'l re di Franza havia dimandà con lettere al signor Constantin passo e vituarie a Capriata e do altri loci; rispose non li poter negar.
     
      Item, che francesi dovea prender la via di Gavio per Zenoa con fanti 4 in 5 milia, et che ditto Constantin era reduto sospeto per la benivolentia avia con li Adorni zenoesi primarii.
     
      Da Lion, esser ordinà che di 1000 lanze sono lì in Aste, 100 resta, el resto vadi a Zenoa capitano domino Baptistino et monsignor di Serenon, e fanti 1500 provenzali capitano monsignor di Cental, et altri 3000, che erano a le frontiere di Spagna et in Provenza. Esser fate molte provision di vituarie, acciò, havendo Zenoa, si provedesse.
     
      Item, per la vale di Lucerna et Augusta, passavano per Aste fanti 2500.
     
      Item, aver da' cantoni di sguizari non esser tropo satisfati di le page lhoro, e pochi seguiva Franza. Che 'l marchexe del Final dimandava, si per obviar francesi el perdesse il stado o qualche loco suo, che la liga si dovesse ubligar di restituirlo etc., et che 'l ditto non volea principiar, ma lacessito, et havia scrito a Lucio Malvezo cussì facesse.