Item, dil zonzer dil cardinal curcense incognito in Milano in Santa Maria di le Gracie, et per mezo di uno fra Lauro el ducha lo mandò a invitar che in Milano venisse. El qual era a Verzeli, et questo fece acciò non fusse andato in Franza. Et parea disegnasse di andar in Alemagna.
     
      Avixi de Alexandria dal signor Galeazo, el qual dubitava di Bosco et Fregoneto. Voleva fanti et cavali lizieri; che inimici haveano mandà a far fanti tedeschi da 7 in 8 milia; dimandava ajuto a bona hora di la liga, pro portione, per poter parer a l'incontro; esser aviso i nemici trovarse con lanze 900 francese et fanti 300; al continuo zonzeano di altri, et pareva per veduta, cavali 4000 e fanti 4000.
     
      Item, aver aviso esser intra focho nel castel vechio di Aste e brusata la polvere, ruinato uno turion. Et esser zonto Vicenzo Vallier sopranominato ivi in Alexandria, come etiam si vedrà per sua lettera.
     
      Da Seravale, di 24, dil conte di Cajazo, come era stà a Gavio et havea lassà li fanti 200 con uno capo, fornita la rocha; et sperava, per le parole de li Guaschi che sono patroni di dicto loco, el qual è importante.
     
      [487] Item, havia aviso che domino Baptistino dovea tuor l'impresa di Zenoa con 3000 fanti.
     
      Da Monferà, avisi al ducha, come San Piero in Vincula dovea aproximarse a Jovo a dì 25, et a Saona; che i partesani di dicta vale erano scorsi fin verso Saona. Et apresso, che 'l Traulzi havia mandà a dir al cardinal, non potendo otegnir, si conzonzesse con i altri acciò tolesse la volta di Zenoa insieme, e trovando dificile, volteria a Tortona o Alexandria.