Tamen, fo deliberato che 'l non si movesse, et dapoi se intese, a dì 12 ditto, esso re esser partito da Lion e andato a Lilla 3 zornate più in là, et fo ditto voleva andar a le Madalene verso Marseja. Quello di lui seguite, sarà scrito di sotto.
     
      Da Yspruch, vene lettere di Zuan Piero Stella secretario nostro apresso el re di romani. Come la cesarea majestà, inteso di la trieva fatta tra Franza e Spagna, et abuto li capitoli, la copia di qual mandoe a la Signoria nostra et sarano qui avanti scripti, i qualli in alcune parte erano discrepanti da li primi auti ma non in cosse sustantial; et che non volea dir la sua opinione, né risponder di voller intrar sì o no, se prima non sapeva il voller de Italia e praecipue di la Signoria nostra, perché volleva esser con quella di un medemo voller, hessendo collegadi ad invicem.
     
      Lettera de 19 marzo di Thadio di la Motella, data nel Bosco. Come el signor misier Galeazo, il zorno avanti da matina era andato a Spino, qual era in man de' inimici, con cavali lizieri et il proveditor di stratioti, et si extimava si doveseno render. E avanti che ivi andaseno, andono a uno altro che se domanda Monbardo e l'ebeno; poi andono a Spino et ebbeno la terra. Introno dentro, e andono a la rocha la qual mai si volse render, et el signor Galeazo deliberò darli la bataja, et ge la dete in modo che non la poteno haver. Fo feriti forsi 16 et morti alcuni de li nostri et anche di lhoro, e così nostri se retirono indrieto, et veneno al Castelazo a dì 19 a hore 19, con tutti quelli haveva con lui.