Da alcuni erano confortate dicendo le zente erano andate a l'impeto di francesi; tamen, le done piangeva a cargava lhoro drapi involendoli in linzuoli sopra la testa, e se ne fugia fuora di la terra, et cussì molti homeni, dubitando non esser tagliati a pezi da' francesi. Et il partirse de' nostri, fo caxon di ruberteschi. Et havendo zà el proveditor montato a cavalo, dicti ruberteschi li mandò a dir che cavalchasse con li stratioti, et cussì si fece rediguarda ne li lochi pericolosi, et cavalchono a tempo di notte. Et mia 2 lontano trovoe el signor Galeazo et Frachasso a visin de Montbaldo castelo inimico, con zercha cavali 200 tra ballestrieri e stratioti italiani, che stavano lì. Non ossava passar dubitando di ditto castello che non fusse fornito di artellarie e zente che li facesseno danno. Et zonto lì el ditto proveditor, tutti si alegrono et domandono il suo parer di quello se havesse a far. Et ditto proveditor se lamentò con lhoro che erano venuti via senza dirli niente, et lhoro rispose che non haveano habuto il tempo. Et el proveditor disse si era vituarie per 10 zorni che era di ritornar in Spin e [565] farsi forte, perché altro modo era vergogna abandonar l'impresa. Et lhoro risposeno non li pareva di tornar, dicendo non li esser vituarie, e che li franzosi se vegneria a ingrossar molto più, et forneriano Montebaldo di artellarie e zente per modo che non si poria poi ritornar adrieto, ni haver soccorso dei nostri cussì presto. Et vedendo questo ditto proveditor, che volevano ritornar, li disse che almancho si doveria fornir Spin de fantarie, et lhoro disse haveano fantarie a suficientia, e che bisognava salvarse lhoro in prima.