1.° Namque, partes suprascriptae convenerunt quod fiat tregua, et abstineatur a bello per mare et per terram inter dictum regem Franciae et ejus [585] regnum, dominia, terras, vassallos, subditos et confoederatos in praesenti capitulatione parte sua nominandos, necnon regna, terras et dominia subditosque confoederatorum ipsorum ex una, et praefatos regem et reginam Hyspaniae et illustrissimum principem dominum Joannem eorum primogenitum filium et haeredem, eorumque regna et dominia, terras, vassallos, subditos ipsorum collegatorum; ita et taliter quod, neque per mare neque per terram, non fiat neque fieri possit bellum ab utraque partium, nec capi possint terrae, oppida, castella et loca, furtive vel violenter neque alio quovis modo, nec intercipi navigia, neque depraedari, nec alios actus belli committi. Quae quidem tregua inter praefatos regem Franciae et regem et reginam Hyspaniae, incipere habeat die quinta marcii proxime futuri, et quantum ad confoederatos et adhaerentes partium, quoniam nimium distant a loco conclusionis induciarum, incipiat tempus die 25 mensis aprilis proxime sequentis, et duret a diebus suprascriptis usque ad primum novembris proxime venturi.
      2.° Debent publicari dictae induciae in civitate Narbonae et Perpignani die quinta marcii publice, aut citius si fieri poterit, et in futurum dictae induciae observentur per regem et reginam praefatos in regnis, dominiis et per subditos ipsarum majestatum; et quantum ad dominos eorum confoederatos, a die 25a aprilis, durare debeant inter omnes et per omnes praenominatos a dicta die usque ad primum novembris.