Publicato in Felizano luogo del Monferà, da matina a dì 24 april 1497.
     
      Et essendo stà publicato la trieva, non essendo più bisogno di tegnir campo, a dì 28 april, nel consejo di pregadi fo decreto che li proveditori dovesseno ritornar a caxa, et le zente nostre andar a' lhoro alozamenti che prima haveano, et il conte de Petigliano ritornasse a Gedi. Et cussì fono expedite lettere in campo, et le zente duchesche zà erano andate a li alozamenti, et quel campo si disciolse, come dirò più avanti. Et cussì francesi, chi andoe in qua, e chi in là.
     
      In questo mezo, el re di Franza elexe tre oratori a dover andar justa i capitoli di la trieva a li confini di Perpignam e Lenguadocha, per esser insieme con li oratori hyspani e tratar la paxe, i qualli fono monsignor di Albes, monsignor di Arzenton che alias fo qui oratore, et monsignor de la Mota, che etiam fo oratore a Fiorenza. Et quel monsignor de Albes, fo quello pacificò el re di Spagna con Franza, quando li restituì Perpignano. Et il re di Franza era a Lion.
     
      Da Napoli, lettere di Marin Zorzi doctor, orator nostro. Come don Ferando Consalvo capitano yspano, quasi come capetanio de ventura, era andato ad alcuni lochi su quel di Sora teniva il preffeto, et voleva recuperarli; ma questa era una stratagemma. Unde, fo scrito a Roma et a Napoli che questa non era la intention di la Signoria, che hessendo fatta la tregua, sotto specie di esser capitano di ventura, si innovasse alcuna cossa. Adeo, non seguite altro.
     
      Vene in questi giorni 4 arsili de stratioti, et [611] discargoe su Lio, et si aspectava il resto fino a la summa di cavalli 500. I qualli di zorno in zorno doveano zonzer, et tutti zonseno, et fono mandati alozar in Friul, come dirò di sotto.