Item, in quella sera, fo expedito lettere in diversi luogi, prima a Roma a Nicolò Michiel doctor et cavalier orator nostro, in Elemagna a Zuan Piero [664] Stella nostro secretario, in Spagna a Jacomo Contarini doctor et cavalier orator, a Napoli a Marin Zorzi doctor orator, a Milam a Marcho Lippomano orator, in Savoia a Marcho Zorzi orator, a Bologna a Antonio Vincivera secretario et a Zenoa poi etiam a Zorzi Negro secretario, demum a Pisa a Francesco de la Zuecha secretario. Et ancora in quella sera fo scrito a tutti li rectori di le nostre terre, Padoa, Vicenza, Ruigo, Verona, Brexa, et Bergamo di questo. Et maxime a Verona che dovesseno haver custodia di le forteze, per ogni bon rispeto et cossa che potesse occorer. Dove si ritrovava esser la moglie di dicto marchexe venuta lì a dì 23 per esser el zorno di San Zuane a la zostra, et era alozata in vescoado, et non sapendo che 'l marito fusse casso, quel zorno di la zostra era a cavalo et andoe per le sbare. Et benché queste cosse sopra dil marchexe si tratasse, tamen, intendendo la Signoria che essa marchexana voleva venir di Mantoa a Verona, ch'è mia 20, fo scrito a Lunardo Mocenigo podestà et a Nicolò Foscarini capitano di Verona che la dovesseno honorar et darli ducati 25 al zorno per le spexe, et cussì fu facto. Etiam fo scrito a Zorzi Corner cavalier podestà et Francesco Mocenigo capitano di Brexa, che uno di lhoro dovesse notificar questo al conte di Petigliano era a Gedi a le stantie, mia 10 di Brexa. Et cussì, abuta la lettera la domenega, fo a dì 25, el luni Francesco Mocenigo capitano cavalchoe a Gedi a notifichar tal cossa al preffato conte.