Da Savoja, per lettere di Marco Zorzi orator nostro. Chome quel ducha si havia tolto zoso di voler andar in Franza lui, ma poria esser mandasse suo fiol dal re: che si aspectava et poi vene uno ambasador dil re di Franza preditto.
     
      Item, che 'l re, a dì 22 zugno, si partì da Lion e andoe a Tors per andar verso Molines, dove era sua sorella madama de Bia et moglie dil ducha di Barbon, et che esso re haveva pur fantasia a le cosse de Italia, et che quella madama, la qual non voleva più el venisse in Italia, li voleva dar piaceri e far zostre acciò tal fantasia li ussisse dil capo. Et Zuan Jacomo di Traulzi era partito di Aste, come ho scrito, et andato in Franza a trovar il roy. Per la qual cossa la Signoria, vedendo quel ducha non volersi partir di Turin, solicitoe Bertuzi Vallier orator designato in loco dil preditto Marco Zorzi, che si dovesse meter in hordine, perché lo volevano expedir. Et havendo per avanti inteso nostri come quel ducha haveva piacer di haver do cavali barbari che fosseno [674] coradori velocissimi, fo comprati in questa terra do li qual costò duc. ... l'uno, et a esso ducha mandati a donar, per conservar l'amicitia era.
     
      [1497 07 06]A dì 6 ditto, vene lettere di Jacomo Contarini dotor et cavalier orator nostro in Spagna, date a Medina, de dì 24 mazo fino 10 zugno. Prima, come ivi a Medina di Campo, lige 30 più in là di Burgos verso Portegallo, si ritrovava la majestà dil re et di la regina venuti per acompagnar sua fiola la principessa dona Ysabella maridata nel re di Portogallo, con la qual doveva andar el ducha di Alve, et speravassi la conclusion dil matrimonio di una fiola di esso re natural chiamata dona Zuanna in el ducha de Viseo conte Zorzi, fo fiul natural del re di Portogallo morto.