Et cussì fo decreto, et de caetero, dicti di Citadella veneno a le appellation a Padoa. Era tunc podestà per dicti signori sanseverineschi uno citadin padoano chiamato domino Antonio Boromeo doctor. Et questo, non senza causa, ne ho voluto far qui nota.
     
      [1497 09 05]A dì 5, nel consejo di pregadi, fo fato la commissione a li nostri oratori vanno in Spagna, e la commissione a ser Zuam Paulo Gradenigo va proveditor a Pisa.
     
      In questo zorno, a dì 5, per lettere di Corfù et di Candia, se intese come sul mar era qualche pericolo per li corsari, et che era stà preso 2 gripi sora il Sasno veniva di Candia da' corsari francesi. Unde, in el consejo di pregadi fo preso et scrito al rezimento di Candia, che si vedeseno bisogno, dovesseno immediate lì in Candia armar 2 galie sotil con li soracomiti candioti, et agumentar a questo modo [750] l'armata era in Arzipielago, per esser con Hironimo Contarini proveditor. Ancora fo fato la comission a li oratori andava in Spagna, e al Gradenigo a Pisa.
     
      Da Milam. Continuamente era avisi. Et di Savoia di Bertuzi Valier orator nostro, come se intendeva in quelle parte el re di Franza esser certo questo anno per vegnir in Italia, et che havia consejato a Molines, dove era, tal sua venuta, et terminato che 'l conzi le cosse con Spagna, et che 'l vegni. Per la qual cossa, el ducha di Milano havea grande paura, et comenciava a notifichar come per si sollo non era bastante a resister, et dimandava che la Signoria preparasse li 800 homeni d'arme et 6000 fanti era obligata a dar in suo ajuto.