Che 'l volesse el roy far armata, si stava in qualche dubitatione, et se intese come el cardinal Samallò era privato di l'auctorità havia apresso el re di Franza, e questo perché, zà anno uno in qua, contrariava la venuta soa. Et per lettere di Bertuzi Valier orator in Savoia, etiam se intese la dispositione di esso re di vegnir, et il cardinal Vincula si ritrovava a Chier, et tramava di far paxe et perlongar la trieva, né volleva venir più vanti si non con reputatione.
     
      A Roma. In questo tempo, il pontifice vene a luce di uno tratato voleva far uno custode, over castelam yspano era in Hostia, zoè dar quella terra a' Orsini. Et quello menato a Roma, et inteso la verità, doveva farlo impichar. Et cussì fo fato.
     
      A Napoli. Quel regno in confusione per le extrusion feva il re don Fedrigo, adeo haveano molti baroni mal animo chiamando alcuni Franza; ma la Signoria nostra scrisse che dicto re, per ben suo et de Italia, dovesse pacifichar quelle cosse. Et il legato cardinal Valenza si partì di Napoli a dì 22 avosto, havendo dato gran spesa al re, per esserli stato su le spale a soe spexe alcuni zorni, et con 300 cavalli, adeo, volleva ducati ... di spesa al zorno. Or ritornoe a Roma, havendo, come ho scripto, abuto le investiture del re, sì de Benivento, licet fusse terra di la Chiesia, come di la baronia di Flumari et dil contà di Montefoscolo per uno fiol fo dil ducha di Gandia, nepote di questo Alexandro pontifice. Et a dì 12 septembrio, vene etiam lettere di Napoli come el re havia fato parlamento con molti baroni, maxime quel di Bisignano, e 'l principe di Salerno non era venuto, et havia dato le investiture et confirmato certi capitoli ad vota a li syndici di Cajeta.