Dapoi, brusato el gripo con tre brigentini et tuti i suo' alozamenti; perfin i suo' leti et tuto quello era sopra la marina, et toltoli tutta l'artegliaria, fra la qual una bombarda grosissima de fero simel a questa mia grosa, et una pasavolante de metallo, la qual adoperava sopra una careta. Veramente la victoria seria stà compita contra dicto corsaro, se 'l predicto traditor marchexe non lo havia ajutato, perhoché tuti seriano stati nostri presoni. Per la qual cosa, atrovandose dicto corsaro con i compagni preservato ne la terra del predicto traditor marchese, li mandai a far un protesto in bona forma in nome de la Signoria nostra, rechiedando li corsari et etiam le robe prese. Per el qual mi fo resposo che me ne andase con Dio. Inteso tal risposta, deliberai di tegnir ogni mezo posibele per veder de obtegnir la intention mia. Perhò, fixi meter in terra alguni boni pezi de artelaria, con le qual ruinai molte caxe in la terra et amazatoli molti homeni. Et questo continuai tre dì et tre notte, solo per dar teror a questo marchese ladro, per otegnir ut supra. Et visto non li poser far altro, andai personalmente in terra con el forzo de li mei homeni, et fisi dar el vasto a le sue vigne, et meter foco a li soi zardini. Non restarò de dirte questo. Se io a questo trato havesse havuto 2 galie in mia compagnia, veramente haria fato in poche hore cossa che per longo tempo se ne haveria parlato a honor de la Signoria nostra. Non ha voluto questo la fortuna mia, et sia tuto a fin de ben et laude del nostro Signor Dio.