Da Pisa, letere di 4 octubrio. Chome Zuam Paulo Gradenigo era di Agnam, dove era stato fin hora, intrato in Pisa, alozato in la contrà di San Martin in una caxa de uno citadino dicto el Compagnom.
     
      Item, che Zustignam Morexini provedidor era etiam lui in Pisa, in la caxa di Medici, assà mejorato, perhoché era stato in extremis. Che di la peste altro non si sentiva. Li citadini comenzavano a ritornar in la terra, et solicitavano che la Signoria non li volesse abandonar, perché di brieve compiva la trieva, et che fiorentini fevano zente. Et zonse in questi giorni quel orator pisano che alias stete qui, nominato di sopra, et quello che era si partì et ritornò a Pisa.
     
      Or consultato la materia di Pisa nel consejo di pregadi a dì 11 ditto, fo posto parte di mandar uno capo a Pisa, videlicet domino Marco da Martinengo condutier fidelissimo nostro el qual havea cavalli 240, et li fo cresuto fino a la suma di 300 cavali, et do altri condutieri, qual parerano al colegio, con 200 cavali: in tutto 500 cavali. I qualli fono: Zuam Gradenigo patricio nostro et fradelo di Zuam Paulo era ivi, con cavali 100, et Ascanio et Jacopo da l'Anguilara fradeli, fono figlioli dil signor Deyphebo, con altri 100 cavalli, et foli dato danari, et subito fati cavalchar a Pisa. Ancora mandono duc. ... milia ivi, acciò, bisognando, li contestabeli mandati potesseno far fanti a custodia lhoro. Et scriseno non se li mancheria in cossa niuna. Et Zuam Paulo di Manfrom, per esser mal in hordine et haver la sua compagnia quasi disfata, dimandò licentia di andar a tuor la [802] moglie era in reame, et li fo data.