[1497 10 26]A dì 26, ancora, per lettere di Bernardo Zigogna capitanio di le galie di Barbaria, se intese come havia trovato una barza de corsari portava lanze, [811] a' mori a Tunis, et quella prese a dì 20 setembrio, combatendo virilmente. El qual capitanio havia solum 2 galie.
     
      Nota. La barza era di Ferando di l'Isola corsaro, di botte 1000. La prese in colfo di Tunis.
     
      A Milano, morite a dì ... de l'instante l'arzivescovo de Milano domino Guido Antonio Rizimboldo, che alias a la Signoria nostra fue oratore, et fu sepulto honorifice, factoli exequii. El dicto arzivescovado, el qual ha de intrada ducati 5 milia, el ducha lo dete a suo nepote fiol dil ducha di Ferara cardinal de Ystrigonia, el qual a Ferara tunc era, et a Roma per el pontifice fue etiam conferito.
     
      [1497 10 25]A dì 25 ditto, nel consejo di pregadi, fo asolto Gorlino da Ravena contestabele nostro deputato a Roverè, el qual, per haver usato parole molto superbe contra Nicolò Foscarini provedidor nostro in campo, fu preso di mandarlo a retegnir, et scampoe et poi si vene a presentar, et tandem, stato mexi ... fue asolto.
     
      In questi giorni, vene in questa terra incognito don Ferante fiol dil ducha di Ferara, che era stato in Franza, et alozoe in caxa di Zuam Mocenigo era stato vice domino a Ferara, et in questo mexe si ritrovava esser cao dil consejo di X. Et a dì 26 zonse quivi, et subito zonto fu a la Signoria secreto. Et fo divulgato tramava di dar el Casteleto di Zenoa al ducha de Milam, dimostrando lo 'l dava il padre suo a requisitiom di la Signoria, perché havia auto una protesta in scriptura dal re di Franza che non lo dovesse dar.