Et ambidui ogni zorno se trovano con el papa. Se rasona che il roy ha facto pace con el re de Spagna, et credese che la sarà universal. Questi zorni el pontifice è stato ad Ostia. Non so si el re di Napoli se sia trovato a parlamento, come è stà rasonato. Per intercession dil ducha de Milan et suo voler, el cardinal fiol dil ducha di Ferara haverà lo arcivescoato di Milam. El pontifice à conduto un misier Zuam Cariglio spagnolo fradel dil cardinal arzentin con 150 lanze, el qual era in reame, et falo venir a quelli lochi vicini a' colonesi et conteschi per asestar le cosse.
     
      [1497 10 29]A dì 29 octubrio, di Veniexia si partì don Ferante fiol dil ducha di Ferara, stato, come ho scripto, in cha' Mocenigo, et ave da la Signoria doe volte audientia, et ritornò a Ferara. Et la terra al presente non era mal disposta contra il ducha de Ferara, perché pareva, non potendo far altro, si volesse mendar et esser ubediente fiol a la nostra Signoria.
     
      Da Napoli. El re Federico atendeva pur a la [814] ruina dil principe di Salerno. El qual, preso che l'have Salerno, se redusse in una valada in marina in forteza molto forte, come testifichava l'orator suo era in questa terra. Marim Zorzi orator nostro era a Napoli, e di queste materie dil regno non scrivo copioso per poterle al presente intenderle mal. Fortasse, di sotto ne scriverò qualcossa e de tutti li progressi di esso re don Federico.
     
      Non voglio restar da scriver, chome in questo mexe de octubrio, a dì 7, ritrovandomi a Padoa, intisi chome in questa terra si divulgava esser letere a Ferara di Berlingier Caldora era in Franza.