Or per il ducha de Milano fo mandati doy oratori a congratularse di la assumptione al duchato, et dolersi di la morte dil padre. Et nostri, havendo hauto risposta da Polo Pixani cavalier podestà di Bergamo come non poteva andar per egritudine, et aceptata la sua scusa, iterum, a dì 2 ditto, nel consejo di pregadi, ballotadi li rectori di Bergamo, Brexa et Verona, et quello acciò fusse più presto et per mancho spesa, et rimase Nicolò Foscarini capitanio di Verona. Et li fo scrito dovesse andar in Savoia. Et cussì mandono via Zuam Piero Stella secretario, che con lui andasse, el qual zonse a Padoa a dì 7 de l'instante, et a Verona andoe, et el Foscarini, postosi in ordine, cavalchoe a Turino.
     
      [1497 12 04]A dì 4, fo divulgato el principe di Salerno era contento di accordarsi con il re di Napoli. Li lassava el stato tutto suo, e volleva andar in Franza con le persone et le robe, e doveva vegnir a Sinigaja; ma dimandava passo e receto da la liga, et maxime la fidejussion di la Signoria nostra. Per la qual cossa, fu consultato inter patres di condur dicto principe a stipendio nostro, et fo scrito a Roma et Milam erano contenti de far ogni fidejussion. Il successo scriverò di sotto.
     
      [1497 12 06]A dì 6, per letere di Bernardo Bembo doctor et cavalier, vicedomino nostro a Ferrara. Come a dì 3 di l'instante madona Anna, fo sorella dil ducha Zuam Galeazo de Milan et moglie di don Alfonxo primogenito dil ducha di Ferara, zorni tre dapoi ritornato esso ducha in Ferara, era morta da parto, havendo parturito una puta, et etiam la puta morite.