Item, di dar a 4 nobeli nostri stati su la galia Morexina, videlicet sier Zaccaria Morexini de sier Marin, et sier Hironimo Zulian de sier Antonio, et sier Anzolo Querini q. sier Pasqual, et sier Beneto et sier Francesco Guoro q. Pandolfo, per anni do, una balestraria per uno. Et cussì fo presa ditta parte. Tamen, è mala stampa.
     
      In questo consejo, a eterna memoria, noto chome rimasi signor di notte dil sestier di Santa Croce, et intrando ne farò mentione il giorno che intrarò. Mi tolse sier Andrea Badoer q. sier Zuane realissimamente.
     
      [1498 03 18]A dì 18 ditto, vene in questa terra uno ambasador dil re Federico di Napoli chiamato domino Antonio Palmerio doctor. Li fo mandato contra molti cavalieri et degni patricii. Fo alozato in cha' Venier in calle di le Rasse, et fatoli le spexe el primo zorno, justa il solito. Et a dì 20, andoe a la Signoria a la prima audientia insieme con el Spinello, et era vestito di panni lugubri, con mantello et una bareta di veluto negro in capo, per la morte dil principe di Spagna parente dil suo re. Et cussì è per star in questa terra, et domino Johanne Baptista Spinello, tolto licentia da la Signoria nostra, a dì 24 ditto partite, et per mar ritornoe a Napoli, essendo stato molto in questa terra et con gran gracia et orator per nome di tre re. Et non voglio restar di scriver, che ebbe tanta gratia con la Signoria nostra, che, a sua requisitione, fu lassato di prexon uno doctor [907] siciliano che havia robato, et confessato dovea esser mandato a la leze, cossa mai più non fata, et pur con l'autorità di li capi dil consejo di X, li fo scapolata la vita.