Erano capi dil consejo di X Troylo Malipiero, Antonio Trum et Alvise da Molin, et chiamato il consejo, fu decreto di retenir questi et etiam la ditta Laura. Et cussì, questo Antonio domenega da mattina fue retenuto, che era in caxa de ditta Laura stato amalato, e etiam questo Zuam Battista che veniva di Mantoa, hessendo in la barcha luni, Zenoa capitano el prese et fece venir in prexon. Et butato il collegio, tochò a questi: Lorenzo Venier consier, Troylo Malipiero cao di X, Nicolò Michiel doctor et cavalier avogador di comun, et Marco Antonio Morexini cavalier inquisitor, i qualli el luni da matina sbarono tutto el palazo quasi, et examinati da poi disnar li expediteno, et fo cossa presta, videlicet che questo Antonio sia impichato in quella notte cussì come si trovava, et Zuam Battista, per non esser di consejo segreto et non vi esser leze ordinasse fusseno fati morir se non chi era di consegii secreti, fo confinato in perpetuo dentro le mure a Retimo, con taja, si l'ussirà, chi 'l prenderà vivo habi l. 3000, et morto 2000, et preso si 'l sarà, sia poi impichato etc. come in ditta condamnason apar. Et dicto Antonio fo lassato tutto il zorno su la forcha, et la sera fue levato di la forcha et mandato a sopelir. Et è da saper, che dicto Antonio era stato anni 40 a la canzelaria; ma era poverissimo. Havia mujer la qual steva a Padoa, et da l'hora che 'l fo preso fino che 'l fo apichato, non volse mai manzar né confessarsi, ni comunicharsi. Et quando el fo apichato, perché non era corda né si trovava da comprar per esser le botege serate, mandono a l'arsenal a tuor certe corde, et cussì lo apicono.