Et el ducha andato a Parma, dimanda 60 milia ducati, et parmesani li recusano non li voler dar; ma più presto abandonar el paese. Et il ducha dicea volerli avanti si parti di Parma.
     
      Item, cambioe tutti li castelani di le forteze sue, come di sopra ho scrito.
     
      [1011]Sumario di una lettera di Pisa de Vicenzo Valier, data a dì 5 lujo.
     
      El magnifico misier Piero Duodo, in zorni 5 1/2 vene da Veniexia a Castelnuovo di Garfignana, poi stete de lì aspetar la scorta zorni 3. Zonse eri qui con tanta alegreza e contento di questo populo e soldati, che più non si poria dir. Spiero in Dio se meterà qualche bon sesto a queste cosse, siché intenderete che di tutto non si perde tempo. El magnifico misier Thomà Zen, doman o l'altro partirà e vegnirà a dretura a Veniexia. De qui è un grandissimo caldo. El forzo de le zente nostre sono a Chasina et a Vicopisano, dove credo doman se trasferiremo ancor nui. Ozi non si à potuto andar. Ex Pisis, die 5 julii 1498.
     
      Et è da saper, come ditto Thomà Zen ritornava in questa terra per ordine et decreto di lo excelso consejo di X, et questo per li mali portamenti soi. Per esser molto colerico et furioso, diceva villania a tutti, et altre cosse che a ditto consejo parse fusse meglio di levarlo di ditta impresa. Et pisani atendevano a scuoder le lhoro intrate. Tamen, quella impresa non era ben governata, et tra' nostri era discordia. Et Marco da Martinengo, a chi fu dato il governo, non si portava chome doveva, pur per nostri era temporizato, perché non si haveva di mandar niuno altro capo lì. Zuam da la Riva in questi giorni partite di Verona con la sua conduta fata meglio che 'l potè, et verso Pisa per la via di Ferara andoe.