Item, che li oratori nostri da la regia majestà et la corte erano aspectati con gran desiderio, et si li preparava di farli gran honor.
     
      Item, che li oratori d'Ingaltera solicitaveno el re a confirmar la pace et benivolentia con il suo re.
     
      Item, che havendo il re ordinato di far nel borgo di Paris alcune giostre per alegreza di la sua intrata, hessendo reduti in una caxa molto vechia alcuni baroni et certe damiselle per veder, et perché erano molti, ditta caxa over fazada cadete, et ne amazono assai, tra i qualli do baroni che haveano de intrada più di 60 milia scudi per uno, et molte damisele zentil et polite, adeo el re e tutta la corte ne have gran cordoglio et mal augurio.
     
      Item, come el re con la reina, fo moglie di re Carlo, erano spesso insieme, et concluderiano le noze, et la sua moglie faria andar in uno monasterio, la qual si ritrovava al presente in certa terra.
     
      Item, come haveva scrito a Lion et mandato l'araldo acciò fusse fato le spexe a li nostri oratori per tutto.
     
      Da Roma. Come don Alfonxo, fo fiol natural dil re Alfonxo, era di Napoli ivi venuto per concluder le noze di la fia dil papa madona Lugrecia. Tamen, opinion è de l'orator nostro che non haveria effecto.
     
      Item, mandoe li capitoli di la pace di Orsini et colonesi, li quali sarano scripti di soto.
     
      Item, che l'orator di Franza solicitava el papa la dispensation di le noze di la moglie dil suo re et poter tuor la raina Anna fo moglie di re Carlo, et che 'l papa voleva dispensar, et haveva mandato uno messo in Franza per stafeta molto veloce, per veder di haver qualche stato in Franza per soi fioli et [1020] dispensar dicte noze, licet li oratori soi fosseno quasi ivi zonti.