Da Roma, vene lettere di ultimo avosto. Come Piero di Medici era varito, et havendo concordato tuto, con 200 homeni d'arme da Tiano partiria per venir verso Siena a trovar il ducha di Urbino, et che il cardinal era tornato a Roma, et che infallanter a dì 3 sarebeno a cavallo haviandose verso Fiorenza, et che li 2000 ducati dimandoe a la Signoria havia trovati. Siché di brieve, da quella banda si sentiria qualcossa.
     
      Item, come el cardinal Ascanio, partito zà alcuni zorni di Roma et andato a Marino locho di colonesi, d'indi fo divulgato era andato a Napoli a trovar il re Fedrigo, per parlar insieme e tramar qualche praticha secreta.
     
      A dì 6, da Rezano propinquo a Perosa, vene lettere di Piero Marzelo proveditor nostro, insieme col ducha di Urbino. Come non havia ancora abuto la resolutione di Siena in darli el passo, dove Alvise Sagudino se fatichava. Et haveano dicto voleano aspectar uno orator fiorentino che a dì 4 dovea andar ivi, et poi responderiano. Tamen, che si havea bona speranza. Et è da saper, che senesi volevano il stato lhoro in protetione fusse tolto da' nostri, et cussì per avanti ex senatus decreto fue tolto et aceptato.
     
      Item, come el ducha havia abuto uno brieve dil papa che li scriveva non andasse per le sue terre, che per niente non li volleva dar il passo. Al qual el signor li volea risponder: "Io son soldato di la illustrissima Signoria, et anderò per dove la mi comandarà."
     
      Item, che perosini, licet doy parte di Bajoni fusseno una con nui l'altra con fiorentini, che tandem, quella comunità si era risolta che andasseno per alcuni castelli di Astor Bajone ch'è conduto con nui, che nulla li diriano etc.