Vene domino [7] Nicolao Bonafide nuncio dil pontifice a tuor licentia, et concordoe ivi con li provedadori al sal la materia di sali del Benvegnati da Perosa etc. Et fato li capitoli, ditto nuncio expose come el signor di Chamerino voria poner soi fioli con la Signoria nostra a stipendio. Li fo risposto non esser tempo al presente, et cussì, tolto licentia per ritornar a Roma, li fo donato e ballotà in collegio una peza di zambeloto paonazo, qual costò ducati 28.
     
      Vene etiam domino Laurencio Suares orator yspano, et notifichoe haver auto licentia da li soi regali di repatriar, hessendo stato fuori di caxa soa cinque anni, el qual solum fo nel principio chiamato dal suo re per doi mexi; et che soa moglie era stata causa di haver auto la licentia. Tamen, staria ancor in questa terra 15 giorni per metersi in hordine; et si da' fiorentini veniva la resolution, come si aspectava, perché era do oratori fiorentini qui per tramar acordo et se interponeva ditto orator yspano, era contento restar altri 15 zorni, sichè staria uno mexe. Li fo risposto per el principe laudando la sua bona voluntà et disposition, et che si vederia la risposta de' fiorentini.
     
      Ancora, vene domino Antonio Palmerio dotor e cavalier, orator dil re Federico di Napoli, qual ha una lingua molto expedita. Et disse come el re suo, per l'infiniti oblighi havia a questa Signoria era suo fiol, et notificava como mandava in Franza per visitation de la figliola che ivi se ritrova, chiamata madama Carlota, uno orator chiamato domino Antonio Frixon, con trenta cavali, et che pertanto rechiedeva la Signoria volesse scriver a li nostri oratori in Franza residenti, che, in quello potevano, dovessero a domino Antonio predicto dar favore apresso la regia majestà. Li fo risposto sapientissime per el principe nostro, comemorando quello havia fato questo stado per la majestà dil suo re et per conservation de Italia.