Et fu fato cassier; balotati li savii di terraferma tutti, et rimase sier Zorzi Corner el cavalier per do mesi, benché erano do cassieri electi per pregadi, zoè sier Andrea Suriam et sier Piero da cha da Pexaro, qual ozi etiam introe.
     
      Dapoi disnar, fo pregadi et leto lettere infrascripte, zoè:
     
      Da Ferara di sier Bernardo Bembo doctor, cavalier, vicedomino nostro, di 29 octubrio. (?) Dil zonzer lì de Italiam da Carpi nostro condutier, con parte di la compagnia qual va a Ravena. E la sera poi zonse lì el conte Zuam Francesco di Sanseverino conte di Cajaza con 100 cavalli et tre burchi di fanti cargi, venuti per Po, et il resto di sue zente vien driedo, venuto per [8] nome dil ducha de Milano, et subito se partì per seguir dicto Italiam da Carpi et svalizarlo potendo. Ma il nostro vicedomino fè subito far lettere di passo, et comandamenti per nome dil signor a li passi di Po che li nostri fusseno li primi passati, sichè niun danno sequite. Et il ducha di Ferrara tunc si ritrovava a Volane a pescar, a' soi consueti piaceri.
     
      Da Pisa di 25 septembrio, lettere di ser Piero Duodo e ser Domenego Malipiero provedadori nostri. Come fiorentini erano levati col campo da li 2 campi di Vorno et andavano a Librafata, locho tenuto per nostri. Et che luchesi li danno passo e vituarie. Dimandavano essi proveditori ducati 10 milia per desviar li fanti nemici, et ducati 20 milia per dar la paga a le nostre zente ivi erano: et zà bona parte di danari era in camino et se li mandava. Item, como nel bastion di Librafata era fanti 1000 nostri.