Fo aldito sier Tomà Zen cavalier [40] et sier Zuam Paolo Gradenigo, stati provedadori a Pisa, item, sier Troiam Bollani, ivi stato et a Lucha, Marco d'Arzignan vice colateral a Brexa, et prima li tre oratori pixani Lucha di Lanti, Piero di San Cassano et Janozo Lanferduzi, et etiam uno homo d'arme dil conte di Petigliano, praticho a quelle vie. Concluseno era quatro vie tutte cative, et li passi streti et pericolosi, et bisogna passar con scafe il fiume dil Serchio, sichè l'andata è molto dificultosa. Et è da saper, che 'l marchexe ha mandato Antonio di Pii, condutier nostro di 100 cavalli et uno suo a veder li passi incogniti; et si ha speso prima ducati 11 milia al marchexe, ducati 3000 al signor Zuane suo fratello, ducati 1000 li fo dati per parte di 2000 provisionati, ducati 500 mandati a Roverè a far schiopetieri, ducati 4400 al conte Bernardin, si meta in hordine con la soa compagnia di cavalli 1000 per andar col marchexe, et ducati 600 ad Antonio di Pii. Ne bisognava ancora ducati 60 milia per dar le page a le zente, et doman si mandarà ducati 5000 a Mantoa con sier Nicolò Foscarini. Et in questo tempo in Veniexia si faceva diferentia da' banchi a contadi tre e mezo per cento, sichè el denar era caro.
     
      Da poi disnar fo pregadi, et per non vi esser el principe, referì Zuam Piero Stella secretario quelo havìa referito in collegio di le cosse di Franza; poi per sier Alvixe Bragadin procurator, savio dil consejo in setimana, la venuta dil marchexe di Mantoa, et quello disse; dil tuor licentia di oratori fiorentini; di Zuam Alberto da la Pigna; dil conte di Pitiano quello havia dito in collegio, et di le provision fate et la spesa come ho scripto di sopra.