Da poi disnar, fo gran consejo, et da poi pregadi, dove fo leto le lettere che questa matina in collegio non fo lete.
     
      Da Milan, di 17, l'orator nostro. Dil partir de lì de domino Zorzi Brognolo orator dil marchese di Mantoa senza risposta dil ducha, et dil venir di monsignor di San Martin venuto di Franza con uno Filippo ... di Pietrasancta, qualli parlono al ducha in campagna. La causa non se intende. Item, dil mandar Filipino dal Fiesco a Parma a far zente; et fa fortifichar li lochi sora Ojo, et havea fato vegnir a Milan 6 citadini di Lodi per dubito di la fede lhoro.
     
      [52] Da Turino di Zuam Dolze secretario, di 14, date in Aste. Come era stato in coloquio con misier Zuam Jacomo di Triulzi, qual li disse havia scrito al re, da Lodi e Trezo dove ha le sue possession, et havia scrito a domino Alexandro Malabaila secretario dil re in bona forma; et come havia lettere di 10 da Paris il re di romani esser a Messa in Lorena, e tratava acordo mediante el ducha di Lorena e monsignor di Sars overo di Spars. Item, come esso misier Zuam Jacomo havia abuto il juramento di la terra di Spin, di volontà dil ducha di Milam.
     
      Da Crema, di 18, dil podestà. Come el ducha di Milan faceva fortifichar la bastia di Ceredo propinqua a Crema, che è in la juridition nostra, la qual cossa è contra li capitoli, et vi ha mandà fanti dentro. Item, le zente, erano in Sonzin, fono levate et andate in cremonese et parmesan; el qual ducha vol omnino obstar al marchexe di Mantoa.
     
      Di Mantoa di sier Nicolò Foscarini proveditor, di 19. Dil zonzer lì, e molti avixi.