Et have solum 26 balote di no, atento il bisogno di danari havia la terra, et su la spesa grande si era.
     
      Item, fo messo parte per li savii che la conduta dil conte di Pitiano comenzi a dì primo decembrio proximo, habbi ducati 50 milia per anni do a [56] l'anno, et uno di rispeto, in libertà di la Signoria; et qui fo gran disputatione, et fo referito per sier Nicolò Trivixan savio dil consejo, era in setimana, le parole havia ditto esso conte in collegio, et fo terminato remeter a doman a expedir, et comandato secretissima credenza, et dato sacramento per li cai dil consejo di X, a bancho a bancho, acciò non se divulgasse per la terra fino non fusse expedito.
     
      [1498 10 23]A dì 23 octubrio in colegio. Vene uno orator dil signor Astor de' Manfredi di Faenza chiamato domino Job Bianchelo dotor, con lettere di credenza, et sentato apresso el principe, expose come quel signor si racomandava a la Signoria nostra, pregando li fosse mandato qualche dinar per dar a le sue zente, erano in campo; et li fo risposto per el principe si vederia di darli danari, etc.
     
      Vene il conte di Pitiano, qual disse la soa resolution era questa firmissima haver adesso ducati 12 milia che resta ad haver, et 100 homini d'arme: zoè resta ad haver per raxon de li soi capitoli per il tempo manchà fino al principio di la nuova conduta vol far la Signoria, et poi habbi ducati 50 milia a l'anno. Fo risposto per el principe soa signoria si doveva contentar di la diliberation fata, per esser fiol et carissimo di questa Signoria.