Et come el Turcho confinava propincho a la rocha per le raxon dil Zernovich di la Montagna negra. Item, di la cossa di Zupa fo gran dono a li citadini di Cataro per l'intrade, la qual rebelion processe da 4 giotoni, quali fono bandizati perhò per il consejo di X. Item, che il sanzacho di Scutari Ferisbei ch'è homo da ben, ma quello subaslach governador di stato fo di Zernovich è cativo etc. fè alcuni dani a le ville di Cataro. Si scrisse et fè restituir parte del danno. Item, voria li ducati 350 dona la Signoria a quelli di Cataro, et che la muraja staria ben a la cadena al principio di quel colfo, dove steno li stratioti: si spenderà ducati 100. Item, Cataro conclude esser fortissima et inexpugnabile, non pol acamparsi campo a torno; e che li turchi di Castel nuovo per non poter far senza la terra di Cataro convicinano ben. Cataro è ben populado, ha bon [105] animo verso la Signoria, la camera è povera: ducati 150 solum, oltra la spexa. Laudò il camerlengo sier Nicolò Balbi fo di sier Marco; et el principe de more lo laudoe, etc.
     
      Da Mantoa di sier Nicolò Foscarini, di 6. Come certissimo el signor era acordato con Milan, et dimandava licentia, altramente crede el signor ge la daria. Item, per un'altra lettera, dice el signor haverli ditto da si volerli dar ducati 3000 di contadi lì, et ducati 1000 faria dar in questa terra, et dil resto provederà, et volea meter a conto certe quantità havia dato a' nostri homini d'arme di le terre nostre. Et come esso proveditor havia mandato tutti li danari a Verona; è sier Zuam Paulo Gradenigo partito per Ravena; et che li capitoli dil marchexe con Milan erano questi: esser capitano dil re di romani e dil ducha di Milan, e luogotenente de' fiorentini; li danno ducati 50 milia a l'anno di moneda, che verà ducati 41 milia di boni danari; li dà per pegno e promision el ducha di Ferara.