Da Siena di Alvise Sagudino secretario, di 6. Come Pandolfo Petruzi voria el signor Antonio Maria si conzasse con la Signoria nostra. Item, come era posto una imposition in Siena universal a modo fazion, per la qual troverano 10 in 12 milia ducati da spenderli a lhoro bisogno.
     
      Da Corfù. Dil baylo et capitano nostro, di 25, in risposta di quello li havia scrito li avogadori, zercha i azalli che uno portava in Turchia. L'altra zercha i gripi di stratioti manda de qui, cavali 56, quali erano zonti su Lio, et fo dato la biava. La terza lettera zercha avisi il Turcho preparar armada.
     
      Da Napoli di Romania di sier Francesco Bragadino et sier Scipion Bon rectori nostri. Come fortificaveno quella terra et voriano una galia sotil andasse lì, per certi bisogni.
     
      Di Modon di sier Nicolò da cha Pexaro provedador di l'armada, di 26 octubrio. Scrive haver da Syo di 8 da Zuam di Tabia, consolo nostro, scrive a dì 25 septembrio da Constantinopoli, el Turcho facea [130] preparar tutti i vasi da mar per ussir con grossa armada a tempo nuovo contra Rodi; et le sue do nave grosse esser stà poste a charena per esser legnami nuovi e feva aqua. Item, haver lettere di sier Nicolò Marzello sopracomito, di 5 octubrio, sora le saline di Cypro, come partito sora el Cavo, trovò do fuste di corsari turchi et una di quelle butoe a fondi. Item, haver deputà le galie ha ad andar con sier Simon Guoro, zonto el sarà de lì, a Pisa, zoè sier Polo Nani et il sibinzam, et sier Zuam Francesco Basadona con la sua galia habi a menar l'orator a Constantinopoli.